英國考牌過咗，下一步點做？

  英國生活     英國揸車

恭喜你通過英國駕駛考試！無論你係剛剛抵英，定係喺度生活咗一段時間，考到英國車牌都係一大成就。通過筆試、實習、再加上駕駛路試，終於可以合法喺英國揸車。咁下一步應該點做？以下係你需要知道嘅重要事項：

先好好慶祝一下！

考試唔易過，特別係英國對駕駛安全要求好高。你而家有咗自由，可以隨時揸車周圍去，的確值得開心一下！

申請正式駕駛執照 Full Licence

通常考官會即場幫你申請正式駕照，你只需要交返你嘅臨時駕駛執照 Provisional Licence 比佢地就得，佢地會幫你交資料比 DVLA (Driver and Vehicle Licensing Agency)。

但如果你唔想即刻交出臨時牌（例如你需要用嚟做身份證明，或者你搬過屋地址唔一樣），你就要自己填寫 D1 表格，連同身分證明文件同臨時牌一齊寄去 DVLA。

等正式駕照未寄到之前，可以用你嘅 Pass Certificate 作為通過考試的證明。

買你人生第一部車

如果你打算自己買車，記住細車（例如 1 公升引擎）通常唔止平啲，連稅、油費、保費都平好多。

買之前建議睇下車款屬於邊個「保險等級」，一級至五十級之間，級數愈低保費通常愈便宜。高性能車就自然會貴。

對於 25 歲以下嘅新手，最抵保險通常都係啲細 Hatchback，例如：Citroen C1,  Ford Ka, Kia Picanto, Hyundai i20, Fiat 500。

買二手車會比新車平好多，但風險亦會高啲。建議經車行買，通常會有檢查同最少六個月保養；如果私下買，最好帶埋識車嘅朋友一齊去睇車。

搞掂車保險先可以出車

唔理你揸邊部車，只要落英國馬路，一定要有車保險。就算你只係偶爾揸父母部車，都要被列為「Named Driver」。

如果你自己有車，記住未攞車前（包括由賣家屋企揸返自己屋企），都要買好保險。

保險有三種主要級別：

• 第三者責任（TPO）：只保其他人，唔保你自己架車。
• 第三者、火災同盜竊（TPFT）：比 TPO 多保火災同被偷。
• 全保（Comprehensive）：包晒上面全部，連你自己架車損壞都保。

有時候，全保反而仲平過 TPO，因為保險公司認為肯買全保嘅人揸車會小心啲。

為架車繳稅 Vehicle Tax

買車後，記得要交稅先可以揸。新車通常車行會代你搞好。買二手車就要用「log book」入面嘅綠色新車主編號去網上交稅。

幾多錢要睇你架車幾新、二氧化碳排放量幾多。綠色車輛稅平啲，電動車（直到 2025 年 4 月）暫時免稅。

買故障保險援助服務 Breakdown Cover

新手駕駛最怕係半路拋錨，有 Breakdown Cover 起碼有得救。

有啲計劃包路邊維修、拖車，甚至你屋企部車啟動唔到都會上門幫你。可以喺網上比較唔同公司價錢。

第一次獨自揸車

冇教車師傅喺旁邊幫你踩 Brake，第一次自己一個人揸車，真係會緊張。

建議一開始搵屋企人或者朋友陪你揸幾轉，揀啲熟悉又少車嘅路先開始。慢慢建立信心，再考慮去遠啲或者繁忙時間開車。

進一步提升駕駛技巧

你可以報讀 Pass Plus 課程，約六個鐘，內容包括夜間駕駛、高速公路駕駛、唔同天氣情況下的駕駛技巧等等。

成功完成課程有機會減保費，而且有啲地區政府會補貼部分學費。

總結：駕照只係開始，安全與責任更重要

喺英國揸車雖然自由方便，但規矩好多，責任重大。由申請正式駕照、買車、買保險、繳稅，到第一次獨自上路，每一步都唔可以馬虎。

希望以上資訊幫到你安心上路，安全駕駛，享受英國生活！